دو چشمی "ھ" اور ہائے ہوز"ہ" میں فرق

 

” ھ “ اور ” ہ “ میں فرق

.................................................................

” ھاں “ اور ” ہاں “ کیا دونوں درست ہیں؟ اِسی طرح ” ہم “ اور ” ھم “ میں کیا فرق ہے ؟

جان لیجیے کہ اُردو میں دو چشمی ” ھ “ جسے ہاے مخلوط بھی کہتے ہیں کا استعمال دو حروف تہجی بنانے کے لیے ہوتا ہے ۔  مثلاً :  

بھ ، پھ ،  تھ ، ٹھ ، جھ ، چھ ، دھ ، ڈھ ، رھ،  ڑھ، کھ،  گھ، لھ،  مھ اور نھ وغیرہ۔

بعض جگہوں پر خوب صورتی یا کسی اور وجہ سے لوگ ابتدا میں ” ھ “ کا استعمال کرتے ہیں۔ مثلاً:  ”ھم“ ،  ” ھماری “ اور ” ھاں “ وغیرہ  مگر یہ استعمال درست نہیں ہے ۔  اولاً اس لیے کہ اردو میں کسی حرف کی ابتدا میں ” ھ “کبھی آ         ہی نہیں سکتا  کیوں کہ یہ صورت عربی سے آئی ہے۔

یہاں ذوقؔ کا ایک شعر اہلِ ذوق کی نذر کرتا ہوں :

ہائے رے حسرتِ دیدار ، مِری " ہائے " کو بھی

لکھتے ہیں ہاے دو چشمی سے ، کتابت والے

ثانیاً دو چشمی ” ھ “ کی اکیلی مستقل آواز اردو میں نہیں ہے بلکہ اسے کسی دوسرے حرف کے ساتھ ملا کر لکھا اور پڑھا جاتا ہے، جیسا کہ اوپر مثال میں دیا گیا ہے۔ دو چشمی ” ھ “ اردو میں ہندی زبان سے اخذ کی گئی ہے اور یہ صرف چند حروف کے ساتھ ہی آسکتی ہے۔ اردو کے تمام حروف تہجی کے ساتھ نہیں آ سکتی مثلاً :

بھ ، پھ ، تھ ، ٹھ ، جھ ، چھ ، دھ ، ڈھ ، گھ ، اور لھ وغیرہ۔

اس کے علاوہ باقی حروف کے ساتھ دوچشمی ” ھ “ نہیں آسکتی ، جب کہ ” ہ “ کی ایک الگ مستقل آواز ہے ۔

ذیل میں دوچشمی ” ھ “ یعنی ہاے مخلوط اور ” ہ “ یعنی ہاے ملفوظ کے چند جملے لکھے جارہے ہیں، انھیں پڑھ کر  قارئین کو اندازہ ہوجائے گا کہ ان دونوں کے پڑھنے میں کیا فرق ہے اور اُردو زبان میں یہ دو مختلف ھ/ہ   الگ الگ کیوں رائج ہیں اور ان کی اہمیت کس قدر ہے؟

دیکھیے : لفظ " بھاتے اور بہاتے " پہلے میں ہاے مخلوط اور دوسرے میں ہاے ملفوظ ہے۔ اب ان دونوں کا ایک ایک جملہ ملاحظہ کیجیے :

✨ ہاے مخلوط ” ھ “ کے ساتھ مثال : ننھے مُنے بچے مَن کو *بھاتے* ہیں۔

✨ ہاے ملفوظ ” ہ “ کے ساتھ مثال : لاپرواہ لوگ پانی زیادہ *بہاتے* ہیں۔

دیکھیے : لفظ " پھاڑ اور پہاڑ "

✨ ہاے مخلوط ” ھ “ کے ساتھ مثال : بچے نے کاپی کا صفحہ *پھاڑ* دیا۔

✨ ہاے ملفوظ ” ہ “ کے ساتھ مثال : *پہاڑ* پر چڑھنا ایک مشکل کام ہے۔

دیکھیے : لفظ " تھ اور تَہ "

✨ ہاے مخلوط ” ھ “ کے ساتھ مثال : دنیا کا ایک مُلک *تھائی* لینڈ بھی ہے۔ ایک فقیر تھا۔

✨ ہاے ملفوظ ” ہ “ کے ساتھ مثال : ایک *تِہائی* کام ہو گیا ہے دو تِہائی باقی ہے۔

دیکھیے : لفظ " ٹھ اور ٹہ "

✨ ہاے مخلوط ” ھ “ کے ساتھ مثال : آج کل اُن دونوں کی آپس میں *ٹھنی* ہوئی ہے۔ ٹھن ٹھن گوپال۔

✨ ہاے ملفوظ ” ہ “ کے ساتھ مثال : درخت کی *ٹہنی* پر بلبل نغمہ سرا ہے۔ کہانی اچھی ہے۔

دیکھیے : لفظ " جھ اور جہ "

✨ ہاے مخلوط ” ھ “ کے ساتھ مثال : قرض کے بار نے *بوجھل* کر دیا ہے۔ بوجھ اٹھانا ۔

✨ ہاے ملفوظ ” ہ “ کے ساتھ مثال : *بوجہل* کو محبوب ﷺ دکھائے نہیں جاتے۔ جہلا کے ساتھ نہیں الجھتے۔

دیکھیے : لفظ " چھ اور چہ "

✨ ہاے مخلوط ” ھ “ کے ساتھ مثال :قربانی کے جانور کے لیے *چھرا* تیز کرو۔ چھا گئے گرو!

 ✨ ہاے ملفوظ ” ہ “ کے ساتھ مثال :خوش خبری سُن کر اُس کا *چہرا* کِھل اُٹھا۔

دیکھیے : لفظ " دھ اور دہ "

✨ ہاے مخلوط ” ھ “ کے ساتھ مثال: صبح صبح میرا *دھندا*  کاروبار ) خراب نہ کرو(

 ✨ ہاے ملفوظ ” ہ “ کے ساتھ مثال :مذہب ہی نجات *دہندہ* ہے۔ اسے مضبوطی سے تھام لو۔

دیکھیے : لفظ " کھ اور کہ "

✨ ہاے مخلوط ” ھ “ کے ساتھ مثال : میرا قلم کہیں *کھو* گیا ہے

✨ ہاے ملفوظ ” ہ “ کے ساتھ مثال :اب *کہو* کہاں جانے کا ارادہ ہے ؟

دیکھیے : لفظ " گھ اور گہ "

✨ ہاے مخلوط ” ھ “ کے ساتھ مثال : جنگلات میں *گھنے* درخت ہوتے ہیں

✨ ہاے ملفوظ ” ہ “ کے ساتھ مثال : اُس نے اپنی شادی پر *گہنے* اور دیگر زیورات پہنے تھے۔

اصل متن  فیس بک پیج "اردو نحو''  سے کاپی پھر  اسے ایڈٹ کر طلبہ  اور اساتذہ  کے استفادے کے لیے  یہاں ساجھا کیا  گیا ہے۔